Puzagipo-on ako ko Ingaran o Allah a Makalimo-on a Masalinggagaw, (Tharo-angka (ya Mohammad) a Sukaniyan so Allah a Isa-isa * Allah a kapupangangaronganan a ginawa * a da mbawata ago da mbawata-an * ago da a saginda niyan a isabo. ago batiya-an iyan so: Puzagipo-on ako ko Ingaran o Allah a Makalimo-on a Masalinggagaw, (Tharo-angka (ya Mohammad) a mulindong ako ko Kadnan o khapita * pho-on ko karata o miya-adun * ago pho-on ko karata o kagagawi-i igira a miyakalibotung, ago pho-on ko karata o puphangiyop ko manga palot (a ipuphangata-o) ago pho-on ko karata o makatipo igira a miyanipo. Puzagipo-on ako ko Ingaran o Allah a Makalimo-on a Masalinggagaw, (Tharo-angka (ya Mohammad) a mulindong ako ko Kadnan a somisiyap ko manga manosiya * a Dato o omanga manosiya * a puzimba-an o manga manosiya * pho-on ko karata-an o pamomodiyok a di-i manooso-ok * a so puphamodiyok ko manga rarub o manga manosiya * a pud ko manga Jinn agoso manga manosiya. orianiyan na ipanapo niyan angkoto a dowa a ra-on a lima niyan sa sadun sa khagaga niyan ko lawas iyan, sa ipho-on iyan ko olo niyan agoso paras iyan agoso tampar sa ona-an ko lawas iyan. Sa nggolawla-an iyan oto sa makatulo makasoy.
So Allah, da a puzimba-an a thitho arowar Rukaniyan, a oyagoyag a mamamayandug, a di thoratodun ago di thorogun, a ruk Iyan so nganinonganin a madadalum ko manga langit agoso nganinonganin a madadalum ko lopa, da a makaphanapa-at sa hadapan Iyan inontabo o kabaya Iyan, a katawan Iyan so nganinonganin a mipmamasa-i ran agoso nganinonganin a mao-oriyan iran, ago da a khasaruzuban iran a maitobo ko ilmo Iyan arowar ko kabaya Iyan, a kalalangkoloban o korsi Iyan so manga langit agoso lopa, ago di Ron mapunud so kasisiyapa sa dowa oto, ka so Allah na Maporo a lubi a Mala.
Piyaratiyaya o Sogo o Allah (a so Mohammad) so initoronon a so Qur'an a pho-on ko Kadnan iyan a somisiyapon ago piyaratiyayapun o manga Mu'min, ka oman i isa kiran na piyaratiyaya niyan so Allah ago piyaratiyaya niyan a adun a manga malaikat Iyan, ago piyaratiyaya niyan so manga Kitab Iyan agoso manga Sogo Iyan (sa pitharo iran) a da a zalbo-on ami a isabo ko manga Sogo Iyan a ba ami di pharatiyaya-a, ago pitharo iran a miyamakinug kami ago miyangongonotan kami, rila-ikamingka hay Kadnan ami a somisiyap rukami ka Sukabo i khandodan. Da a iphaliyogat o Allah ko ginawa arowar ko khagaga niyan, bagi-an iyan so balas o miyanggalbuk iyan a mapiya, ago iziksa-on so pinggolawla niyan a marata, hay Kadnan ami a somisiyap rukami na di kamingka ziksa-a oba kami khalipat odi na oba kami kharibat, hay Kadnan ami a somisiyap rukami, na dingka rukami phaliyogatun so margun sa lagid o kinipaliyogatun kaon ko siran oto a miyanga o-onaan ami, hay Kadnan ami a somisiyap rukami, na dingka rukami phaliyogatun so di ami khabalbug ago ma-api kamingka ago rila-i kamingka ago kalimo-on kamingka, Suka i Diyondiyongan ami na tabangi kamingka ko manga pagtaw a manga kapir.
Sabap ko Ingaranka hay Kadnangko a somisiyap rakun na inibutad akun a kilid akun, ago sabap ko kaphakagagangka na pukhalukat akun, na obangka thangana so niyawako na kalimo-onka, na opuman obangka pagoyaga na siyapunkaon so isisiyapka ko manga oripunka a manga Salih.
Ya Allah, mataan a Suka na inadunka so ginawako na Suka i mbonoon, kapaarka so kaphapatay niyan agoso kaoyagoyag iyan, na opagoyagangka na sisiyapangka, na ombonoangka na rilaingka ya Allah, mataan a sakun na phangnin akun Ruka so kapipiya o ginawa.
Ya Allah na lupasakongka ko siksaaka ko gawi-i a kapagoyagangka ko manga oripnka.
Sabap ko Ingaranka ya Allah na ron ako ron den matay maoyag.
Ya Allah, a Kadnan a somisiyap ko pitolapis a langit ago Kadnan a somisiyap ko lopa, ago Kadnan a somisiyap ko Arash a lubi a mala, hay Kadnan ami a somisiyap rukami, ago Kadnan a somisiyap ko langowan taman, a phagadun ko od agoso linso, ago tomiyoron ko Tawrat agoso Injeel agoso Qur'an, mlindong ako Ruka pho-on ko karata-an o langowan taman, ka Suka i mapapaaron, ya Allah na Suka i Monapona ka da a miyaonaanka a shai ago Suka i Moripori ka da a mao-oriyanka a shai, ago Suka i makao-ombaw ka da a mao-onaanka sa poro a shai, ago Suka i lomalambas ka da a mao-oriyanka sa baba a shai, na bayadingka so bayadan ami ago baloyakamingka a di makakikinanglan pho-on ko kamurmur.
(Subhanallah) maka 33, Miyasotisoti so Allah , (Alhamdulillah) maka 33 So langowan o bantogan na Ruk o Allah), (Allahu Akbar) maka 33 So Allah na lubi a mala.
Solangowan o bantogan na Ruk o Allah a piyakakangkami Niyan, ago piyakainomkami Niyan, ago inangkosangkami Niyan, ago piyakaapaskami Niyan, ka pirapira puman i taw a da a maangkoson, ago da a phakaapason.
Ya Allah a katawan Iyan so migagaib agoso mipapayag, a miyadun ko manga langit agoso lopa, a Kadnan a somisiyap ko langowan o shai ago kamimilikan Iyan, puzaksiangko a da a puzimbaan a thitho arowar Ruka, mlindong ako Ruka, pho-on ko karataan o ginawako, agoso karataan o Shaitan agoso kapupanakoto niyan, ago oba akun mapakanggolawla so ginawako sa marata, odi na ba adun a marambit akun a Muslim ko marata.
Batiyaan o taw so Surah As-Sajdah agoso Surah Al-Mulk.
Ya Allah inipalad akun Ruka so ginawako ago tinimo akun Ruka so mao-olawlako, ago iniadap akun Ruka so paras akun, ago inipagapas akun Ruka so likod akun sa inam ko balaska ago kaluk ko siksa-aka, ka da a kaphagapasan ago da a kaphagagawan ko kaphalagowi (ko siksa-aka) arowar Ruka, piyaratiyayako so Kitabka a initoronka agoso Nabingka a siyogo-oka.