Pitharo o Rasulullah (ص): Sadun sa taw a tharo-on iyan so: [Subhanallahi Wabihamdihi] (miyasotisoti so Allah a rakus o bantogan Iyan), sa makamagatos si-i ko salongan, na maponason so manga dosa niyan a manga roroni sa apiya pun aya mao-olawla niyan na lagid (sa kadakul) o borabora ko kalodan.
Go pitharo iyan: Sadun sa taw a tharo-on iyan so: Da a pusimbaan a bunar arowar ko Allah a Isaisa a da a sakotowa Iyan, a kiruk ko Kadato, ago kiruk ko bantogan, a Sukaniyan naso langowan taman na magaga-os Iyan. Sa makasapolo makasoy, na miyabaloy a lagid o taw a mimaradika sa pat kataw ko mbawata-an o Ismael.
Go pitharo o Rasulullah (ص): Dowa taga a katharo a makhap a kapukhabalsaon o dila a mapunud si-i ko timbangan a pukhababayaan o Allah, giyanan so: Miyasotisoti so Allah a rakus o bantogan Iyan, ago miyasotisoti so Allah a lubi a Mala.
Go pitharo o Rasulullah (ص): Sabunar dun a so di-i ko katharoa ko: Miyasotisoti so Allah, goso langowan o bantogan na matatangkud a ruk o Allah, go da a pusimbaan a bunar arowar ko Allah, goso Allah na lubi a Mala. na mala a kapukhababayaiko ron a diso nganinonganin a miyatararak o sindaw o alongan.
Go pitharo o Rasulullah (ص): Ino di kaputhorapisi o isa rukano a kapuphakasokat iyan ko o man gawi-i sa sanggibo a mapiya) na ini izaon o miniza a pud ko indadarpa-i niyan: Andamanaya i kaphakasokato isa rukami sa sanggibo a mapiya? Na pitharo o Rasulullah (ص): Puthasbih sa magatos a Tasbih, ka khisorat a bagi-an iyan so sanggibo a mapiya, odi na khaponason so sanggibo a manga roroni a dosa.
Sadun sa taw a tharo-on iyan so: Miyasotisoti so Allah a lubi a Mala a rakus o bantogan Iyan. Na mipamola sa bagi-an iyan a korma si-i ko Sorga.
Go pitharo o Rasulullah (ص): Hay Abdullah Bin Qais, bako suka punggonana-owa ko isa a gadong a pud ko manga gadong ko Sorga? na pitharo akun a tigi Abdullah a: Ombus hay Rasulullah, na pitharo iyan a: Tharoangka so: Da a kapaar ago da a bagur arowar ko kapaar ago bagur o Allah.
Go pitharo o Rasulullah (ص): Aya mala a pukhababaya-an o Allah a katharo na pat soson: Miyasotisoti so Allah, goso langowan o bantogan na matatangkud a ruk o Allah, go da a pusimbaan a bunar arowar ko Allah, goso Allah na lubi a Mala. Sa kuna oba ruka marata sa sadun sa pagona-an kaon.
Go pitharo o Rasulullah (ص): Da a pusimbaan a bunar arowar ko Allah a Isa-isa a da a sakotowa Iyan, so Allah na Mala sa taman a Mala, agoso langowan o bantogan a madakul na ruk o Allah, ago miyasotisoti so Allah a Kadnan a somisiyap ko manga kaadun, ago da a kapaar ago da a bagur arowar ko kapaar ago bagur o Allah, a mabagur a maongangun. Na pitharo o taw sagiya-on a: Giyangka-i a manga katharo na ruk o Kadnangko a somisiyap rakun, na antona-a i rukakunon? Na pitharo o Rasulullah (ص) a: Di-ingka ndowa-an so: Ya Allah na rila-i akongka, ago kalimo-on akongka, ago toroakongka, ago rizuki-i akongka.
Aya mao-olawla o mama igira a miyagislam na iphagunda-o ron o Nabi (ص) so sambayang, orianiyan na isogo iyanon a kindowa-an iyan sangka-i a manga kalima: Ya Allah na rila-i akongka, ago kalimo-on akongka, ago toro-akongka, ago ma-api akongka, ago rizuki-i akongka.
Sabunar a aya makalulubi a dowa-a naso: go mata-an a aya makalulubi a taduntadum ko Allah naso di-i katharo-a ko: Da a pusimbaan a bunar arowar ko Allah.
Aya manga pipiya a phangalalamba naso: (Miyasotisoti so Allah), goso (Langowan o bantogan na matatangkud a ruk o Allah), goso (Da a pusimbaan a bunar arowar ko Allah), go (So Allah na lubi a Mala), goso (Da a kapaar ago da a bagur arowar ko kapaar ago bagur o Allah.