Pitharo o Rasulullah (ص): Ibet ko Allah ka mata-an a sakun na puphangni ako sa rila ko Allah ago diako Ron thawbat ko sold o salongan sa kalawanan so makapito polo makasoy.
Go pitharo o Rasulullah (ص): Hay manga manosiya, na thawbat kano ko Allah ka mata-an a sakun na diako di-i thawbat (ko Allah) ko sold o salongan sa makamagatos makasoy.
Go pitharo o Rasulullah (ص): Sadun sa taw a tharo-on iyan so: Phangni ako sa rila ko Allah a lubi a Mala, a da a pusimbaan a thitho arowar Rukaniyan, a Oyagoyag a Mamamayandug, ago puthawbat ako Ron, na rila-an o Allah sa dapiyapun miyalagoy sa thumowan.
Go pitharo o Rasulullah (ص): Aya mabhabaloy a kapakararani o Kadnan si-i ko oripun na si-i ko tunatunaw a a kaposan o kagagawi-i, na o khagagangka a mabaloyka a pud ko manga taw a di-i puthaduman iyan so Allah si-i sangkoto a wakto na nggolawla-angka.
Go pitharo o Rasulullah (ص): Aya kapakararani o oripun ko Kadnan Iyan a somisiyapon naso kasosodiyod iyan, na pakandakula niyo ron so kandowa-a.
Go pitharo o Rasulullah (ص): Mataan a sabunsabunar a pukhagudi-an so poso akun sa kabaya, ago mata-an a sakun na sabunsabunar a puphangni ako ko Allah sa rila si-i ko mababasa alongan sa makamagatos makasoy.