“So langowan a bantogan na ruk o Allah a so inoyag kami Niyan ko oriyan o kiyabono-a niyan rukami, ago ayabo khandodan.”
“So langowan a bantogan na matatangkud a ruk o Allah a miya-apan ako Niyan ko lawas akun ago piyakandod Iyan rakun so niyawako, ago inisogo Iyan rakun a di-ikoron kathaduntadmi.”
“Da a puzimba-an a thitho arowar ko Allah a Isa-isa a da a sakotowa Iyan, a khiruk ko Kadato, ago khiruk ko Bantogan, ago Sukaniyan na so langowan taman na Magaga-os Iyan, Miya soti-soti so Allah, agoso langowan o bantogan na ruk o Allah, ago da a puzimba-an a thitho arowar ko Allah, agoso Allah na lubi a Mala, ago da a kapa-ar ago da a bagur arowar ko kapa-ar ago bagur o Allah a Maporo a Lubi a Mala, hay Kadnangko a somisiyap rakun na rila-i akongka.”
“Mata-an a madhadalum ko kiya-adna ko manga langit agoso lopa ago si-i ko di-i kapakazambi o kagagawi-i agoso kadaondaw so manga tanda a bagi-an o manga lalantas i akal. A siran oto so di-iran thaduntadman so Allah sa gomaganat siran sa mo-ontod siran sa mi-iga siran ago di-iran pamimikiranun so kiya-adna ko manga langit agoso lopa, (sa di-iran tharo-on) a: Hay Kadnan Ami a somisiyap rukami na dangkaini aduna sa bada-a gona niyan, Miya soti-sotika, na lupasa kamingka ko siksa ko Apoy Naraka, Hay Kadnan Ami a somisiyap rukami na mata-an a Suka na sadun sa taw a paka soldunka ko Naraka; na sabnar a miyapakadapanaska, ago da a phamakatabang ko manga palalalim. Hay Kadnan Ami a somisiyap rukami na mata-an a miyanug ami so puphananawag (so Mohammad) a ipuphananawag iyan so paratiyaya; sa paratiyaya-a niyo so Kadnan Iyo a somisiyap rukano na piyaratiyayami. Hay Kadnan Ami a somisiyap rukami na rila-anka rukami so manga dosami ago sapungingka rukami so manga kasala-an ami a manga roroni ago tarima-akamingka agoso manga taw a khipipiya-piya. Hay Kadnan Ami a somisiyap rukami na buganka rukami so inibugayingka rukami a kapasadan a minggolalan ko manga Sogo-oka ago di kamingka phakadapanasa sa Alongan a mawri ka mata-an a Suka na dika pundorat sa kapasadan. Na tiyarima kiran o Kadnan iran a somisiyap kiran (sa pitharo o Allah ) a mata-an a Sakun na di Akun pagilangun so balas o galbuk o di-inggalbuk a pud rukano; mama anta-a ka babay, ka ndhatadatar kano a langon kano mbalasan (sa mapiya odi na marata) Na so siran oto a miyamanogalin ago piyamaka-awa ko manga ingud iran ago pindharata-an sa lalan ko Allah ago miyamakithidawa ko kanjihad ago miyanga sasahid na sabun-sabunar dun a puma-apun Akun kiran so manga kadosta-an iran ago sabun-sabunar dun a phaka soldungko siran ko manga Sorga a puphamanoga ko kababa-an iyan so manga lawasaig a balas a pho-on ko Allah, goso Allah na Ron matatago so mapiya ko manga balas. Ago oba ruka dun makabirayi so di-ikakhalamilami ago di-ikanggayagomaya o siran oto a da pamaratiyaya si-i ko manga ingud, (ka giyoto) na maito a matag sagad a kapipiya ginawa, orianiyan na aya khandodan iran na so Naraka Jahannam a miyakaratarata a khandodan. Ogaid na so siran oto a inikaluk iran so Kadnan iran (sa di-i kinggolalanun ko inisogo Iyan agoso kapuphananggila-i ko inisapar Iyan) na bagi-an iran so manga Sorga a puphamanoga ko kababa-an iyan so manga lawasaig sa khatatap siranon; a pagadil a pho-on ko Allah, ka so matatago ko Allah na aya mapiya ko manga taw a khipipiyapiya. Go mata-an a pud ko piyamanoronan sa Kitab (siran so manga Yahodi agoso manga Kristiyan) so manga taw a paparatiyaya-an iran so Allah agoso initoron rukano agoso initoron kiran sa thatapapay siran ko Allah, sa di iran puphasa-an so manga Ayat o Allah sa arga a maito, na siran oto na bagi-an iran so balas si-i ko Kadnan iran a somisiyap kiran. Mata-an a so Allah na maga-an i kapamagitong. Hay so siran oto a miyamaratiyaya na zabar kano ago pakipulolaya kano (ko manga ridoay niyo ko Agama Islam) ago atangi niyo siran ago kalkun iyo so Allah (sa di-i kinggolalanun ko inisogo Iyan agoso kapuphananggila-i ko inisapar Iyan) ka kalo-kalo na makadha-ag kano.”